'വിശ്വനാഥ് ആൻഡ് സൺസ്' എന്ന ചിത്രം കണ്ട് വൈകാരികമായി പ്രതികരിച്ച് കന്നഡ സൂപ്പർതാരം ശിവരാജ്കുമാർ. സിനിമ തന്റെ മാതാപിതാക്കളെയും കുടുംബത്തെയും ഓർമ്മിപ്പിച്ചുവെന്നും, ചിത്രം കഴിഞ്ഞിട്ടും ആ വൈകാരിക നിമിഷം മനസ്സിൽ തങ്ങിനിൽക്കുകയാണെന്നും നടൻ വ്യക്തമാക്കി. ഒരു അഭിമുഖത്തിൽ ശിവരാജ്കുമാർ പറഞ്ഞ വാക്കുകളാണ് ഇപ്പോൾ സോഷ്യൽ മീഡിയയിൽ ശ്രദ്ധ നേടുന്നത്.
'ഞാൻ അടുത്തിടെയാണ് 'വിശ്വനാഥ് ആൻഡ് സൺസ്' കണ്ടത്. ചിത്രം കണ്ടു കഴിഞ്ഞ് ഒരു മണിക്കൂറോളം എനിക്ക് ഉറങ്ങാൻ പറ്റിയില്ല. എന്റെ അച്ഛനമ്മമാരെയും കുടുംബത്തെയുമാണ് അത് ഓർമ്മിപ്പിച്ചത്. അതോർത്ത് കണ്ണീരോടെയാണ് ഞാൻ അവിടെ കിടന്നത്. എന്നെങ്കിലും ഇതുപോലൊരു സിനിമ ചെയ്യണമെന്ന് എനിക്കും ആഗ്രഹമുണ്ട്', ശിവരാജ്കുമാർ പറഞ്ഞു. ഭാവിയിൽ ഇതുപോലൊരു വൈകാരിക ചിത്രം ചെയ്യാനുള്ള ആഗ്രഹവും നടൻ പങ്കുവെച്ചു.
അതേസമയം, സൂര്യ നായകനായി എത്തിയ ചിത്രത്തിന് മികച്ച പ്രതികാരങ്ങളാണ് ലഭിച്ചത്. തിയേറ്റർ റിലീസിന് ശേഷം ഇപ്പോൾ ചിത്രം നെറ്റ്ഫ്ലിക്സിൽ ടോപ് 10 സ്ഥാനത്ത് ഇടം പിടിച്ചിരിക്കുകയാണ്. മമിത ബൈജു നായികയായി എത്തിയ ചിത്രം വെങ്കി അറ്റ്ലൂരിയാണ് സംവിധാനം ചെയ്തത്. സൂര്യയുടെ കരിയറിലെ നാല്പത്തിയാറാം ചിത്രമായി എത്തുന്ന വിശ്വനാഥ് ആൻഡ് സൺസ്, ബ്ലോക്ക്ബസ്റ്റർ ഹിറ്റായ ലക്കി ഭാസ്കറിന് ശേഷം വെങ്കി അറ്റ്ലൂരി ഒരുക്കിയ ചിത്രമാണ്.
ഫോർച്യൂൺ ഫോര്‍ സിനിമാസുമായി ചേര്‍ന്ന്, സിതാര എന്‍റര്‍ടെയ്ന്‍‍മെന്‍റ്സ് ബാനറിൽ സൂര്യദേവര നാഗ വംശി, സായ് സൗജന്യ എന്നിവരാണ് നിർമ്മിച്ചിരിക്കുന്നത്. ശ്രീകര സ്റ്റുഡിയോസ് ആണ് ചിത്രം അവതരിപ്പിക്കുന്നത്. ചിത്രത്തിലെ ഗാനങ്ങളെല്ലാം തന്നെ ഇതിനോടകം തന്നെ സമൂഹ മാധ്യമങ്ങളിൽ മികച്ച ശ്രദ്ധ നേടിയിട്ടുണ്ട്. സൂര്യ ആരാധകർക്കും കുടുംബ പ്രേക്ഷകർക്കും ഒരുപോലെ ആസ്വദിക്കാവുന്ന രീതിയിലാണ് ചിത്രം ഒരുക്കിയിരിക്കുന്നത്.
Content Highlights: Shivarajkumar says he got emotional after watching suriya movie vishwanath and sons